1Ti 2 | OKV | STEP | Eto ke kiti ta amo ke nau erevi ava erena, God ta degi penunu ari eto jakeka ari eto God ta hondate avoeto osa ari eto embo tapa avoeto pari evujo.

1 Timothy 2

Naingeto God jakeka asora amita ke ra.

1 Eto ke kiti ta amo ke nau erevi ava erena, God ta degi penunu ari eto jakeka ari eto God ta hondate avoeto osa ari eto embo tapa avoeto pari evujo. 2 Eto ungotena peka ta tunga jamo ari na otohu ue ari jajavotoho pere ue irora enda ta kings te titi jigirikari embopo avoembo pari evujo. 3 Eto ungotenau Orekari Embo God amina embo tapa na amita ke be avo ingihiroro oreketo umbasi uje ere ere ua avoeto pari einge amo javotoho avoeto God na ingito tunga javotoho euja. 5 Eto God vahai ra te embo vahai orohuta mitie embo ta ke ingito God ta degi eoi ingito ke mine Iesu ta degi eoi ingito embo ta degi euja embo amo Iesu Keriso 6 amina ungotena vasiri te irora amita vasiri avo ikena amo iji inono ta ikenu puvunu kia. 7 Eto amita ari avo embo ta degi ke hande ana God na na amita apostel ikena amo ke sokova mane ke be pere amo na enda nei embomeni ta degi God tumota ari amita ke avo ate poekana ikena.

8 Avoeto embo tapa tumo irae tini kambari ke irae teho ingeni otohu na i ta jigito pari ara uje ere ona. 9 Eto pamone na me kiari irae bo javotoho pere evora uje ere ona amo siro pupu ta kogombeto hambo tureto umbuto mane asora te 10 ari jajavotoho God tumota ari pamone amina ombuto aisora. 11 Eto pamone na jamo eto mitie kiari nei eha umbasuja 12 eto pamone na embo titi jigesuja eto ate poekasuja avo na uje ae ra te pamone amo jamo eto iresuja. 13 Eto amita be amo God na embo Adam kiti eto pamone Eve amo ambota ena. 14 Eto Adam avo Satan na engekae rate Eve avo Satan na engeka enu sapura ena 15 Rate pamone amuna meni umbasi ue memenga kogue osa ari te otohu ari te na siro pure ue God tumota ururoro God na kito oreketo umbasuja.